حاول بس

حاول بس
تغرق فى بحور اللون البنى
المرسوم فـ عنيا بألوان الزيت....
حاول بس
تطلع إيديك من جيبك
وتبطل تعمل بردان
فــ يوم مش برد أوى
وتدخل باختيارك
فى أرضى اللى مهياش أرض
محايده ....
حاول بس
تبطل تقرى أخبار الحوادث
اللى شبه بعض كل يوم
وتبدأ تقرى بريد الجمعه
وتعمل نفسك مش واخد بالك
مـــ الشبه الواضح فى الحكايات ...
حاول بس
تفتكر حكايه حكيتهالك من سنتين
وأنا نفسى نسيتها ....
أو كلمه قلتها
وأنا نص نايمه ..
أو عيد ميلاد حد عزيز عليا
سافر ولسه مجاش.....
حاول بس
ترسم فى خطوط كفك
خط شايل اسمى
ساير كما عودى ورسمى
محفور بهدوء بين خط العمر
وخط الصبر....
حاول بس
تشوفنى سحابه معديه
جنّيه بتعوم فى الميه
أو بنت شقيه و أموره
جايه مــ الأرض المسحوره....
حاول بس
تعرف إن حدود الدنيا
مش شرق وغرب
شمال وجنوب
دول لمه وبيت
ضحكه ودمعه
غمزه من عين المحبوب....
حاول بس..