السبت، 9 يناير 2010

عن الملل و 2010


نفسى فى حاجه تغير طعم الملل
اللى فـ روحى..

بدور بهستريا عن أغنيه
فيلم
لوحه
كتاب
لعبه
أو حتى حاجه اقراها فى أى مدونه
تخلينى أحس إنى مبسوطه..
تلون روحى..
تخلينى اضحك بجد
أو حتى أعيط بجد
أو أندهش
أو افتكرها ساعه كامله بعد
ما اخلصها..


كنت مستنيه مفاجأه من الدنيا بس مجتش...
حتى النتيجه أصابتنى بخيبة أمل رهيبه..
ودى أول حاجه تجيلى فى 2010
اللى هى المفروض سنة الحظ بتاعتى
وفقا للأبراج..
بس اللى أنا عارفاه إن 2010 بالنسبه لى
سنة الانتظار واللا حياه ..

الأربعاء، 30 ديسمبر 2009

ساعات وساعات


ساعات أعطش أوى لحبك
كإنى الأرض الطيبه السمره
وأتشقق..
وأجى اشرب من إيدك
من اللهفه عليك اشرق..
واغرق تانى فى عيونك
نبؤة أمى تتحقق
إنتى يا بنتى منذوره
لحزن كبير..
لشاعر عمره ما مسك قلمه..
لنجمه وليل..
فتكون إنت عنوانى
واهتدى ليك
و ف عيونك أتوه تانى..
ساعات وساعات
كإنى للساعه أنا البندول
ما يملكش حلول وسطى
ولا يرتاح لأى حلول..
يا متشرق يا متغرب
بعيد جدا لكنه فى لحظه بيقرب ..
وبيقرب وبيقرب أوى
فى ثانيه
تلاقيه من إيديك يهرب..
أنا البندول .. أنا البندول
أنا العاشق .. أنا الكاره
أنا المعلوم .. أنا المجهول
أنا ..
أنا..
ساعات وساعات..

الأربعاء، 16 ديسمبر 2009






أميره الجميله أوى أوى
إنتاج 1994
ألحان مصطفى قمر
وتوزيع حميد الشاعرى

الاثنين، 7 ديسمبر 2009

حاول بس



حاول بس
تغرق فى بحور اللون البنى
المرسوم فـ عنيا بألوان الزيت....
حاول بس
تطلع إيديك من جيبك
وتبطل تعمل بردان
فــ يوم مش برد أوى
وتدخل باختيارك
فى أرضى اللى مهياش أرض
محايده ....
حاول بس
تبطل تقرى أخبار الحوادث
اللى شبه بعض كل يوم
وتبدأ تقرى بريد الجمعه
وتعمل نفسك مش واخد بالك
مـــ الشبه الواضح فى الحكايات ...
حاول بس
تفتكر حكايه حكيتهالك من سنتين
وأنا نفسى نسيتها ....
أو كلمه قلتها
وأنا نص نايمه ..
أو عيد ميلاد حد عزيز عليا
سافر ولسه مجاش.....
حاول بس
ترسم فى خطوط كفك
خط شايل اسمى
ساير كما عودى ورسمى
محفور بهدوء بين خط العمر
وخط الصبر....
حاول بس
تشوفنى سحابه معديه
جنّيه بتعوم فى الميه
أو بنت شقيه و أموره
جايه مــ الأرض المسحوره....
حاول بس
تعرف إن حدود الدنيا
مش شرق وغرب
شمال وجنوب
دول لمه وبيت
ضحكه ودمعه
غمزه من عين المحبوب....
حاول بس..

الأربعاء، 25 نوفمبر 2009

أخيراااااااااااااااا


أخيرا خلصت سنه خامسه ..
خلصت الباطنه و الأطفال
بعد طول انتظار...


الصوره اللى فوق دى صورة د/ قمر
رئيس قسم الباطنه...

الأحد، 24 مايو 2009

تاج

التاج ده من العزيزه جدا الجواز وسنينه
وده أول تاج يجيلى على الاطلاق...
وأنا أكيد بشكرها مووووت على التاج
وعلى كمية الود اللى أنا بحسه منها حتى من
غير ما نتكلم..
وعايزه أقولها إنى بجد بحبها جدا ...


التاج بقى ..


اسمك ؟؟
هبه ..


المشهوره بيه وسط صحابك؟؟
هبه برضه...


سنك؟؟
22 سنه بحالهم..
كبيره اوى مش كده؟؟


مجال الدراسه؟؟
طب بشرى..


اسم مدونتك؟؟
على بالى
أظن واضح أوى ..


صورتك الرمزيه بتعبر عن ايه؟؟
دى صوره بنوته وأنا عن نفسى بحب الصوره دى جدا..
بتعبر عن ايه بقى؟؟
المفروض ان كل واحد هيشوفها بنعبر عن حاجه
من وجهه نظزه..
بس اللى انا شايفاه
إنها بنت واضحه بقدر ما هى غامضه..
متحرره و متمرده بس بحدود ..
بس كده..



فكرت تقفل المدونه؟؟
لا مفكرتش..
ساعات مبيكونش عندى وقت خالص
انى اكتب حاجه أو حتى إنى أتابع
المدونات اللى بحبها
بس بكون عارفه انى هرجع ليها تانى..


ايه رد فعلك لو حد قل أدبه عليك فى تعليق ؟؟؟
هو الحقيقه ده محصلش قبل كده
ومفتكرش انه هيحصل
لأن ببساطه المدونه ادبيه ومفيهاش موضوعات تثير الجدل..
بس لو ده حصل يبقى يا ويله يا سواد ليله
اللى هيعمل كده ..



أسوء مدونه؟؟
معرفش
المدونه اللى مبتعجبنيش مش بتابعها وخلاص..



هيحصل ايه لايميلك بعد ما تموت؟؟
أكيد هينتحر حزنا عليا ..


اديت الباسوورد لحد قبل كده؟؟
بيتهيألى كل الناس عارفينه..
اخواتى وصحباتى و خطيبى..



السفر بالنسبه لك؟؟
انهى سفر؟؟
لو السفر فسحه يعنى طبعا بحبه جدا ..
لو السفر للعمل
فده بقى مش بايد الواحد
ده ضروره..



المود بتاعك ايه؟؟
يعنى ايه؟؟
مودى دلوقتى زهقانه
بصفه عامه
بكره النكد موووووووووووت ..



بتعمل ايه فى اوقات فراغك؟؟
معنديش ..
هو فى حد بيدرس باطنه ويكون عنده وقت فراغ؟؟



الاكله المفضله؟؟
المكرونه
بجميع اشكالها وانواعها ..


الصفات اللى خدتها من والدك؟؟
طولة البال..


الصفات اللى خدنها من والدتك؟؟
معرفش..



اكتر 6 حاجات بتكرهم؟؟

النكد

الملل

الخيانه

الناس اللى مبتحبش بجد و مبتكرهش بجد ومبتضحكش بجد
ومش بتعيش بجد

كلام الناس على بعضها من غير وجه حق

الظلم

المشاكل
المشاكل
المشاكل



اكتر 6 حاجات بتحيها؟؟

الحب اللى بجد

الصحاب اللى معاك فى كل احوالك

الناس الجدعه

الافكار المجنونه

كتاب يخرجك من المود

الاستفندى



شخصيتك نوعها ايه؟؟
شخصيه بنت حلال..
لو حد من صحباتى ساعدنى فى السؤال ده يكون
افضل..


لماذا دخلت التدوين من الاساس؟؟
لانى حسيت انه بيشجعنى على الكتابه..



اهميه التعليقات بالنسبه لك ايه؟؟
انا بحب التعليقات جدا
سواء بالسلب او الايجاب
لانها بتعرفنى هل انا بجد كاتبه حاجه تستحق
انها تتقرى ولا لا..

وفى ناس بحس من تعليقاتها بالود والاهتمام
ودى طبعا الافضل على الاطلاق..


احلى بوست كتبته ؟؟ ضع اللينك ثم اذكر السبب

أنا مين؟

شغف.

الحاجات

بيتهيألى انا ممكن اكتب كل البوستات فى السؤال ده..



افضل مدونه قرأتها؟؟

هى مش واحده اكيد..
كل المدونات اللى فى الريدر عندى بحبهم جدا

حواديت
من اول المدونات اللى عرفتها ومن افضلهم..

الجواز وسنينه
دايما فى كلام مهم بتقوله..

كلام حسام
اول مدونه ادبيه اضيفها عندى

سلوا قلمى
شعر بجد مش هزار

قصاصه ورق
مش اى قصاصه

سما زرقا وطيارات ملونه
كفايه اسم المدونه عشان تتخيل اللى جواها..


افضل بوست قرأته؟؟
كتير مووووووووووت
مينفعش احدد..


الشغل بالنسبه لك؟؟
أنا لسه بدرس..


الانترنت بالنسبه لك؟؟
ناس تانيه وحياه تانيه



تمرر التاج ده لمين؟؟

لاستاذ حسام صاحب مدونه كلام حسام

لدكتور شادى صاحب مدونه سلوا قلمى

دكتور رامى صاحب قصاصه ورق

دكتور مصطفى سما زرقا وطيارات ملونه

ولاى حد متابعنى وعايز يجاوب عليه..







الأربعاء، 29 أبريل 2009

الجدع الأسمر


و أنا بحكى عن الجدع الأسمر
اللى فى ضله شبك القمر ضيه ..
اللى فى سيرته
بيحكى الحنين حواديت..
اللى ملامحه طيبه ذيه
اللى مخافش فى يوم من جن أو عفاريت ..
وأنا بحكى عن الجدع الأسمر
اللى بيحلم آه
لكنه من خوفه
شال حلمه فى ضلوعه
وطبق عليه كفوفه
خايف ليوم يهرب
من قبل ما يشوفه ..
و أنا بحكى عن الجدع الأسمر
فى شدتك تلقاه
فى وحدتك تلقاه
فى المحنه والضيقه
مع كل خلق الله
طب بعد ده كله
تقدر فى يوم تنساه ؟؟
و أنا بحكى عن الجدع الأسمر
الشمس لو نايمه
تصحى بدفا سكوته ..
والنجمه لو هايمه
يهديها صدى صوته ..
عايش مع الناس آه
لكن فى ملكوته..
و أنا بحكى عن الجدع الأسمر
اللى فى ضحكه بتسكن النداهه
اللى ف عيونه عرفت معنى متاهه
من بين شفايفه لو طلعت الآهه
تكون سنينى فداه
وحياتى وياها ..
وأنا بحكى عن الجدع الأسمر ..

الخميس، 26 مارس 2009

عن الافتقاد


1

عام ربما عامان
لم تعد تعنينى الأيام كثيراً ..
لم أعد أهتم بالتقويم والساعات ..
لم تعد تعنى الأيام سوى
مزيدٌ من الافتقاد ..
مزيدٌ من الشجن ..
والمزيد و المزيد من محاولات النسيان ..


2

صورةٌ بهتت ألوانها
لا تكفى لأتذكرك تماماً ..
و تمزيقها
لا يكفى لأنساك تماماً ..
و الهمس لها
لا يعنى أنك تسمعنى ..
واحتضانها
لن يجعلك بين أحضانى ..
صورةٌ بهتت ألوانها
لا تكفى سوى لبعض الأحلام..

3

مهجورةٌ أنا ..
مهجورة كالمدن القديمه ..
والحكايات القديمه ..
و الأحلام القديمه ..
مهجورة كقصيدة عشقٍ منسيه ..
كطقوس السحر الأسود ..
كـآخر كواكب المجموعة الشمسيه ..


4

تفاصيلى الصغيره التى
لا يعلمها سواك ..
تفاصيلى الصغيره التى
لا تعنى سواك ..
تفاصيلى الصغيره
تفتقدك جداً ..


5

عبثاً أمحوك من عمرى ..
عبثاً اسكت ألحانك المدويه
فى أعماقى ..
عبثاً أكون شخصاً غيرى لا يهواك ..
عبثاً أنساك ..


6

ممنوعة أنا
من العبث بأوراقك سراً
وتقبيلك علناً ..
ممنوعة أنا
من الغرق فى عينيك
والسكون بين يديك ..
ممنوعة أنا من عشقك
و من الاشتياق إليك ..


7

غارقة أنا فى حبك حتى الأعماق ..
غارقة أنا فى حبك حتى الاختناق ..
فحررنى منك إلى الأبد ..
أو اسكنى بين ضلوعك للأبد ..
فما أصعب انتظار خلاص لا يأتى
أبدا ...

الأحد، 22 مارس 2009

صدق أو لا تصدق


امبارح كانت خطويتى
وفنفس ذات الوقت عيد ميلادى
والاحلى من كده بقى انى اتخطبت لاكتر
حد بحبه فى الدنيا ديا...

ميروك ليا وكل سنه وانا طيبه
وعقبالكوا كلوا كلوا...


أسماء عيد ربنا يتمملك على خير ..
أسماء حسين عقبالك..
مى حافظ اوعى تقلقى ....



وباى بقى ..

الخميس، 26 فبراير 2009

دعنى أرحل


دعنى أرحل ..
ربما يوماً ما اشتاق إليك ..
أبكى عليك ..
يؤلمنى غيابك..
دعنى أرحل ..
دعنى أجوب الطرق وحدى ..
و احتسى الشاى وحدى ..
واتصفح الجرائد وحدى ..
واهتم لحالى وحدى ..
دعنى أرحل ..
فلم أعد أنا بطلة أحلامك ..
لم أعد أنا أميرتك القادمه
من عهد الأساطير لتمنحك السعاده ..
لم أعد أنا الملاك الذى بعثه
الله ليغير أيامك ..
دعنى أرحل ..
حررنى من شفقةٍ عليك..
من ذنبٍ احمل إثمه وحدى ..
من وعودٍ سيوجعها الترحال ..
دعنى أرحل ..
لا تنظر لى بعتاب الآن ..
لا تحتضن كفى بحنان للمره الأخيره..
لا تجعل عينيك تدمع بوجودى..
كن صلباً..
كن صلباً كما لم أعتد عليك..
كن صلباً حتى النهايه ..
ودعنى أرحل..