الجمعة، 26 سبتمبر 2008

انا مين؟؟


دايما تسألنى أنا مين؟
انا وعد وعده حبيب لحبيبته
وحافظ عليه.
أنا ضفيرة بنت صغيرة
فى عينيها شقاوة إنما إيه.
أنا دعوة بنت ملقتش لسه ابن الحلال
وبتدعى تلاقيه.
أنا حقنة دوا دخلت وريد عيان وحيد
ومناها ربنا يشفيه.
أنا كفن أبيض ملفوف فيه عريس جديد
وعيون عروسته بتسألنا إذاى هتنسى لياليه؟
أنا فرحة قلوب المصريين
بعد ماتش فازوا فيه.
أنا رسالة حبيب لحبيبته فى عيد ميلادها
اللى افتكرت إنه ناسيه.
أنا جرح عمره حبة سنين
ومش لاقى حد يداويه.
أنا أم شهيد فى عينيها دمع
بس قلبها فرحان بيه.
أنا دقات قلب واحد واقف يستنى النتيجة
والقلق مالى عينيه.
أنا مدفع الإفطار فى نهار طويل
الكل قاعد مستنيه.
أنا قلب مرسوم فى كراسه قديمة
وصاحبه ناسيه.
أنا وش فنجان قهوة بتقدمه بنت لحماها
وبتسأل طعمه هيرضيه؟
أنا جواب مكتوب فيه شعر
والبرفان عطره ماليه.
أنا دفتر مؤذون بيكتب كتاب
واحد عشق سنين طوال.
ورقة إجابة امتحان صاحبها
مش عارف سؤال.
أنا فستان فرح أبيض جميل.
دبلة خطوبه وزنها اتنين جرام.
أنا منديل طار فى الهوا
ولمس السحاب.
عيون مشتاقة تشوف حبيبها بعد الغياب.
ياريتك تكون عرفت أنا مين .

هناك 13 تعليقًا:

محمد سامى يقول...

انتي الدنيا بكل ما فيها
بحلوها ومرها
بمصايبهاوضحكاتها
انتي الدنيا كلها
علي فكره اسلوبك رائع وسلس
لامام دائما

محمد سامى يقول...

انتي الدنيا بكل ما فيها
بحلوها ومرها
بفرحتها وحزنها
انتي الدنيا كلها
الحيره اللي دايما بتكون قدامنا لما نشوف مفاجآتها
انتي الحياه نفسها
اسلوبك سلس وجميل استمري للامام

غير معرف يقول...

تسلم أيدك يا هابى ,,

HAPPY يقول...

ميرسى يا إيمى على التعليق..تسلم إيديا؟؟
كنت متوقعة منك كلام اكتر أو عن الكتابة نفسها..
اكيد انا كده مش معتبراكى قلتى رأيك..

غير معرف يقول...

يا بوبى يا روح قلبى طبعا طبعا جامده ومن غير كلام ولا تفاصيل كفايه ان حبيبتى الى كاتبه يبقى لازم تكون جامده وخلى حد يعترض

HAPPY يقول...

انتى متحمسة اوى يا هبة لكتاباتى..شكرا يا عسل..

غير معرف يقول...

انتى احلى بنت واجدع صديق الواحد ممكن يلاقيه
انتى الحنان والامان وكل اللى الواحد بيحلم بيه
انتى القلب الكبير والعقل المنير وبجد حد ربنا يحميه
بجد اسلوبك رائع
وكلامك يمس القلب على طول
يارب دايما فى تقدم

غير معرف يقول...

جامده جدا جدا جدا والله ياهابى وطريقتك جامده بجد وربنا يوفقك

HAPPY يقول...

ميرسى يا بوسى كات.. انا بحبك اوى وبحب كل الروند وبحب كلية الطب وبس خلاص

غير معرف يقول...

بتحبى كل كليه طب بدون استثناء يا هبه انتى كده قلبك كبييييييييييييييييررررررررر شايل ده كله جوة وساكت

HAPPY يقول...

اكيد يا هبه ..
انا قلبى مساكن شعبيه

غير معرف يقول...

الموضوع كبير كبير كبير يالهوووووووي ياهبه وجعتينـــــــــــــــــــــي اووووووووووووى باءحساسك ورقتك في كلامك يابت انا بفخر ان انا مصاحبه حد زيك ياجماعه علي فكرة دي صاحبتي الانتيم الت اللي كاتبه الكلام ده يعني كل يوم مع بعض بنمشي مع بعض بنروح وبنيجي مع بعض طبعا ليكي الشرف يابت يابنت عمو عادل يلا اي خدمه خليتك ستار

HAPPY يقول...

اكيد انا اللى بفخر يا مى انى صاحبتك وبنروح ونيجى مع بعض وكده..
بس مش هنقضى النهار فخر بقى وكلام من ده..