عيد سعيد

كل سنة وكل الناس طيبين..

الصورة من موقع www.muslmh.com

أهلى وزمالك

ماتش الأهلى والزمالك النهارده.
طول النهار وأنا متوترة واقول يارب
بس مكنتش بدعى لاهلى ولا لزمالك.
يجى الماتش بليل وأقعد اتفرج عليه..
الاهلى يجيب جون اقوم واتنطط واقول هيه.
الزمالك يجيب جون افرح جدا واقوم واقول هيه.

أختى الصغيرة تشوفنى وتقولى :
هو أنتى بتشجعى مين بالظبط؟؟

أرد عليها :
أصل أنا أهلاوية بس هو زملكاوى.

بعيد أوى

يبص لى اوى ويقولى:
اتغيرتى
ضحكتك بقت متكلفة
طريقة كلامك
طريقة تفكيرك
ستايلك
حاسس إنى مبقتش عارفك .

أرد فى سرى :
انا متغيرتش بس أنت اللى بقيت بعيد أوى .

انا مين؟؟

دايما تسألنى أنا مين؟
انا وعد وعده حبيب لحبيبته
وحافظ عليه.
أنا ضفيرة بنت صغيرة
فى عينيها شقاوة إنما إيه.
أنا دعوة بنت ملقتش لسه ابن الحلال
وبتدعى تلاقيه.
أنا حقنة دوا دخلت وريد عيان وحيد
ومناها ربنا يشفيه.
أنا كفن أبيض ملفوف فيه عريس جديد
وعيون عروسته بتسألنا إذاى هتنسى لياليه؟
أنا فرحة قلوب المصريين
بعد ماتش فازوا فيه.
أنا رسالة حبيب لحبيبته فى عيد ميلادها
اللى افتكرت إنه ناسيه.
أنا جرح عمره حبة سنين
ومش لاقى حد يداويه.
أنا أم شهيد فى عينيها دمع
بس قلبها فرحان بيه.
أنا دقات قلب واحد واقف يستنى النتيجة
والقلق مالى عينيه.
أنا مدفع الإفطار فى نهار طويل
الكل قاعد مستنيه.
أنا قلب مرسوم فى كراسه قديمة
وصاحبه ناسيه.
أنا وش فنجان قهوة بتقدمه بنت لحماها
وبتسأل طعمه هيرضيه؟
أنا جواب مكتوب فيه شعر
والبرفان عطره ماليه.
أنا دفتر مؤذون بيكتب كتاب
واحد عشق سنين طوال.
ورقة إجابة امتحان صاحبها
مش عارف سؤال.
أنا فستان فرح أبيض جميل.
دبلة خطوبه وزنها اتنين جرام.
أنا منديل طار فى الهوا
ولمس السحاب.
عيون مشتاقة تشوف حبيبها بعد الغياب.
ياريتك تكون عرفت أنا مين .

رد فعل

:ماما انا بفكر اعمل مدونة.
: اعملى اللى انتى عايزاه بس مالكيش دعوة بالسياسة.

* * * *

: يا آيه (اختى الصغيرة) انا بفكر اعمل مدونه.
:يعنى ايه مدونه؟؟؟؟

* * * *

:يا هبة انا بفكر اعمل مدونة.
:ودى هتكتبى فيها ايه؟؟؟؟
:هكتب عننا ، عن الكلية ، عن اى حاجة .
:فكرة حلوة

* * * *

:اسماء (من الشلة) انا بفكر اعمل مدونه.
:كويس عشان تنشرى الحاجات اللى انتى بتكتبيها، والله انتى بتكتبى كويس.

* * * *

:انا عايزة اعمل مدونه.
:اوكى شوفى انا ممكن اساعدك بإيه وانا اعملهولك.

* * * *

:انا عايزة اعمل مدونه.
:فكرة كويسة.
:مش عارفة هتبقى حلوة ولا لا.
:المهم إنك تستمتعى.

* * * *

: يا إيمان انا بفكر اعمل مدونه.
:وماله يا اختى وماله؟ هو الإنسان ايه غير شوية مدونات فوق بعض.

* * * *

حاجة مهمة

حبيت اقولك كل سنة وانت طيب قبل ما شهر سبتمبر يخلص

احباط

دخلت المطبخ اعمل كوباية شاى..
جيبت براد الشاى والمج بتاعى اللى بحبه اوى وشوية نعناع بقى يا سلام.
حطيت فى المج 3 معالق سكر وقلبت وبعدين طلعت عشان اشربه وانا قاعدة قدام الكومبيوتر(مزاج يعنى)
وقبل ما اشربه افتكرت اننا فى رمضان.