الأحد، 24 مايو 2009

تاج

التاج ده من العزيزه جدا الجواز وسنينه
وده أول تاج يجيلى على الاطلاق...
وأنا أكيد بشكرها مووووت على التاج
وعلى كمية الود اللى أنا بحسه منها حتى من
غير ما نتكلم..
وعايزه أقولها إنى بجد بحبها جدا ...


التاج بقى ..


اسمك ؟؟
هبه ..


المشهوره بيه وسط صحابك؟؟
هبه برضه...


سنك؟؟
22 سنه بحالهم..
كبيره اوى مش كده؟؟


مجال الدراسه؟؟
طب بشرى..


اسم مدونتك؟؟
على بالى
أظن واضح أوى ..


صورتك الرمزيه بتعبر عن ايه؟؟
دى صوره بنوته وأنا عن نفسى بحب الصوره دى جدا..
بتعبر عن ايه بقى؟؟
المفروض ان كل واحد هيشوفها بنعبر عن حاجه
من وجهه نظزه..
بس اللى انا شايفاه
إنها بنت واضحه بقدر ما هى غامضه..
متحرره و متمرده بس بحدود ..
بس كده..



فكرت تقفل المدونه؟؟
لا مفكرتش..
ساعات مبيكونش عندى وقت خالص
انى اكتب حاجه أو حتى إنى أتابع
المدونات اللى بحبها
بس بكون عارفه انى هرجع ليها تانى..


ايه رد فعلك لو حد قل أدبه عليك فى تعليق ؟؟؟
هو الحقيقه ده محصلش قبل كده
ومفتكرش انه هيحصل
لأن ببساطه المدونه ادبيه ومفيهاش موضوعات تثير الجدل..
بس لو ده حصل يبقى يا ويله يا سواد ليله
اللى هيعمل كده ..



أسوء مدونه؟؟
معرفش
المدونه اللى مبتعجبنيش مش بتابعها وخلاص..



هيحصل ايه لايميلك بعد ما تموت؟؟
أكيد هينتحر حزنا عليا ..


اديت الباسوورد لحد قبل كده؟؟
بيتهيألى كل الناس عارفينه..
اخواتى وصحباتى و خطيبى..



السفر بالنسبه لك؟؟
انهى سفر؟؟
لو السفر فسحه يعنى طبعا بحبه جدا ..
لو السفر للعمل
فده بقى مش بايد الواحد
ده ضروره..



المود بتاعك ايه؟؟
يعنى ايه؟؟
مودى دلوقتى زهقانه
بصفه عامه
بكره النكد موووووووووووت ..



بتعمل ايه فى اوقات فراغك؟؟
معنديش ..
هو فى حد بيدرس باطنه ويكون عنده وقت فراغ؟؟



الاكله المفضله؟؟
المكرونه
بجميع اشكالها وانواعها ..


الصفات اللى خدتها من والدك؟؟
طولة البال..


الصفات اللى خدنها من والدتك؟؟
معرفش..



اكتر 6 حاجات بتكرهم؟؟

النكد

الملل

الخيانه

الناس اللى مبتحبش بجد و مبتكرهش بجد ومبتضحكش بجد
ومش بتعيش بجد

كلام الناس على بعضها من غير وجه حق

الظلم

المشاكل
المشاكل
المشاكل



اكتر 6 حاجات بتحيها؟؟

الحب اللى بجد

الصحاب اللى معاك فى كل احوالك

الناس الجدعه

الافكار المجنونه

كتاب يخرجك من المود

الاستفندى



شخصيتك نوعها ايه؟؟
شخصيه بنت حلال..
لو حد من صحباتى ساعدنى فى السؤال ده يكون
افضل..


لماذا دخلت التدوين من الاساس؟؟
لانى حسيت انه بيشجعنى على الكتابه..



اهميه التعليقات بالنسبه لك ايه؟؟
انا بحب التعليقات جدا
سواء بالسلب او الايجاب
لانها بتعرفنى هل انا بجد كاتبه حاجه تستحق
انها تتقرى ولا لا..

وفى ناس بحس من تعليقاتها بالود والاهتمام
ودى طبعا الافضل على الاطلاق..


احلى بوست كتبته ؟؟ ضع اللينك ثم اذكر السبب

أنا مين؟

شغف.

الحاجات

بيتهيألى انا ممكن اكتب كل البوستات فى السؤال ده..



افضل مدونه قرأتها؟؟

هى مش واحده اكيد..
كل المدونات اللى فى الريدر عندى بحبهم جدا

حواديت
من اول المدونات اللى عرفتها ومن افضلهم..

الجواز وسنينه
دايما فى كلام مهم بتقوله..

كلام حسام
اول مدونه ادبيه اضيفها عندى

سلوا قلمى
شعر بجد مش هزار

قصاصه ورق
مش اى قصاصه

سما زرقا وطيارات ملونه
كفايه اسم المدونه عشان تتخيل اللى جواها..


افضل بوست قرأته؟؟
كتير مووووووووووت
مينفعش احدد..


الشغل بالنسبه لك؟؟
أنا لسه بدرس..


الانترنت بالنسبه لك؟؟
ناس تانيه وحياه تانيه



تمرر التاج ده لمين؟؟

لاستاذ حسام صاحب مدونه كلام حسام

لدكتور شادى صاحب مدونه سلوا قلمى

دكتور رامى صاحب قصاصه ورق

دكتور مصطفى سما زرقا وطيارات ملونه

ولاى حد متابعنى وعايز يجاوب عليه..







هناك 15 تعليقًا:

prince4ever يقول...

مبروك عالتاج يا عم
ايه الاجابات الجامده دي
ازيك الاول يا د/ هبه و يا رب تكوني بخير...
انا بجد مش عارف اشكرك ازاي...اول حد يقدرني اوي كده...مش اي قصاصه و تاج ليا... و الله دي كتير...
وعد مني هجاوبه ان شاء الله اول ما اخلص امتحان الاطفال...انتو ناس فاضيه وراكوا باطنه خاصه و دلع... انما احنا في كرب بعيد عنك...
دعواتك... و النبي احنا كليه لها الله...
متشكر كمان مره و يا رب يديم الود
سلاااااااااام

الجواز و سنينه يقول...

موووووووووووووووه

انتى جميله اوى يا هبهو واضحه اوى و رقيقه و كمان و ده بجد مش مجامله انتى اول واحده حببتينى فى الشعر
لانى مش بحب الشعر اوى
انتى تستاهلى كل خير على اد ما انتى نقيه و محترمه
تحياتى يا قمر
و على فكره انا كمان بحبك جدا و الله حتى من غير ما اكلمك بس ليكى فى قلبى مكان كبير كمان

واحد من الناس يقول...

السلام عليكم ورحمة الله وبركاته

والله التاج ده برغم إنه بيبقى ساعات واجب رخم بس ساعات تانيه - زي دلوقتي - بيبقى جاي في وقته لأن الواحي منقطع من زمان

باشكرك طبعا جدا على تمرير التاج وعلى (شعر بجد مش هزار) فرحني جدا رأيك ده

شكرا لك

آه

على فكره أنا برضه من رأيي إن من أحسن الحاجات اللي كتبتيها (الحاجات) حاجه كده بتتطبع في دماغ الواحد ومتطلعش أبدا

تحياتي لك

سلام

Semsema يقول...

لذيذه اوى فكره التاج دى.ماكنتش متخيلاها كده خالص.
شخصيه هبه بقى طيبه اوى وشخصيه دمها خفيف جداوانك بتكبرى دماغك ف حاجات كتير يعنى مش بتزهقى على حد و ف نفس الوقت حساسه اوى واكتر حاجه بحبها فيكى انك بتحبى بجد وانك بتعملى اى حاجه عشان خاطر اللى بتحبيهم.وبجد انا مبسوطه انك صاحبتى

Semsema يقول...

نسيت اقولك امبارح كنت مستعجله بقى.كنت هقولك انى بحب عن الافتقاد جدا وطبعا طبعا انا مين؟
ومافيش حد ف سنه 5 عنده وقت فراغ خالص.
وفكره انك تعملى مدونه كانت مهمه لانك بجد بتكتبى حاجات حلوه من ايام ماكنا بنقرأ ف الاجنده

HAPPY يقول...

دكتور رامى

الله يسلمك .. انا الحمد لله بخير ..
لسه عايشه..
ده اقل حاجه تتقال عن مدونتك بجد مش مجامله..

احنا دلوقتى ورانا اطفال يعنى ودعنا ايام الدلع ..

طبعا انا بدعى للى قدرهم انهم يدرسوا طب..
ربنا معاك ومعانا ان شاء الله

HAPPY يقول...

الجواز وسنينه
الكلام ده كبير اوى..
انا اللى حببتك فى الشعر؟؟
يا نهار ابيض متتخيليش سعادتى اد ايه على الكلام الحلو اوى ده..

HAPPY يقول...

دكتور شادى
وعليكم السلام ورحمة الله وبركاته

الحمد لله ان التاج جاى فى وقته احسن كنت تدعى عليا ولا حاجه ..

اكيد انت عارف انك بجد بتكتب كلام جامد جدا ومش مجامله..

HAPPY يقول...

سمسمه
حبيبة قلبى
كل الكلام الحلو اوى ده عنى؟؟
يالهوى اثرتى فيا والله

وانا مبسوطه اكتر عشان انتى صاحبتى والله يا اسماء.. انا بحبك جدا يا بنتى..

عن الافتقاد
انا قعدت اكتب اسبوعين فيها وطبعا هى عزيزه عليا جدا..

ربنا يعدى السنه دى على خير يا اسماء ان شاء الله..

انتى لسه فاكره ايام الاجنده؟؟

Semsema يقول...

هيا دى ايام تتنسى.انا كنت بحب اقرأ فيها جدا.لان بجد الكلام يستاهل انه يتقرى.وبجد ياهبه انا كمان بحبك اوى.وبجد انت بتكتبى حلو اوى

momken يقول...

اجباتك جميله جداً يا دكتوره

وكلها حكمه وعقل
وخفه دم
كمان متزنه جداً

ربنا يكملك بعقلك

استمتعت بزياره مندونتك


تحياتى

كلام حسام يقول...

د. هابي
ايه الغيبة دي كلها مش معقول

Unknown يقول...

اجابات توضح انك شخصية كويسة جداً وتحترم

اقدم عاصمه فى الحب يقول...

السلام عليكم

وقتى هنا اسعدنى كتير
اجابتك بسيطه اوى
وشخصيتك هنا تقريبا
كأى شخصيه مصريه بجد
صادف معايا الاجابات دى من المصريين بس
ودى حاجه جميله اوى طبعا
.
.
يا ريت تقبلى مرورى من هنا
وودى واحترامى لكِ ولمدونتك الجميله :)

non.fragile يقول...

تعليقي بجد انك ارق احساس وانقي قلب واجدع صاحبه شفتها في حياتي بجد.. دايما موجوده في اي وقت بنحتاجك فيه.
وطبعا انا مش محتاجه اصلا اصلا اقول الكلام ده لانك انتي عارفه غلاوتك عندي من غير ماتكلم بس انا بقول الكلام ده دلوقتي عشان الناس اللي بيقرو ليكي يعرفو علي قد ماانتي شاعرة رائعة الاحساس كمان انسانه وصديقه رائعة الوجود انا بحبك لوي ياهبه بجد والله العظيم....وكفايه كده عشان هعيط
احلي بوست حبيته هم بصراحه بوستات مش بوستبس اكتر حاجه لمستني انا شخصيا سارحل عنك *خاضعة انا
قطرات عرقك انا بعشقها
الجدع الاسمر ده اكيييييييييييييد ولا ايه؟