بادور عليك

بادور عليك فى كل الحاجات..

فى صوره قديمه ..

فى عمرى اللى فات ..

فى ملامحى اللى كبرت

فى بعدك كتير ..

فى ضفاير مجدوله

فوق ضهر البنات..

بادور عليك فى كل الحاجات..

فى عتمه ، فى نور..

فى قمقم وتايه وسط البحور ..

فى ترعه بتجرى وسط التعب

ووسط الآهات ..

بادور عليك فى كل الحاجات ..

فى كحلى اللى ساح ..

فى واحده مش شاطره

غير فى النواح ..

فى حدوته نهايتها تبات ونبات ..

بادور عليك فى كل الحاجات ..

فى ناس واقفه فى طابور العيش ..

فى بصمه إيديا و أنا بعمل فيش ..

فى كلمة أمى معدش ومفيش ..

فى غنوه فى الراديو بتقول ساعات ..

بادور عليك فى كل الحاجات ..

فى سبحة جدى القديمه أوى ..

فى ضحكه عاليه لكن مش أوى ..

فى دعوة مظلوم ربنا على القوى ..

فى أول كلمه بعد السكات ..

بادور عليك فى كل الحاجات ..

فى ملاية سرير ..

فى عز الحر فى كوباية عصير ..

فى حاجه ضايعه وفارقه كتير ..

فى فرحه معاها حبة عياط ..

بادور عليك فى كل الحاجات ..

فى دمعه ويا الحنين سهرانه ..

فى نجمه باصه على النيل

لكنها عطشانه..

فى بطانيه تدفينا وهى بردانه ..

فى يوم بدايته شاى وبقسماط ..

بادور عليك فى كل الحاجات ..

بادور عليك فى الوحده والزحمه ..

بادور عليك فى الصحبه والرحمه ..

فى ورقة جرايد لافين بيها

اللحمه ..

فى كلمة حب تقرب المسافات ..

بادور عليك فى كل الحاجات ..

فى لون الزرع بعد شوية مطر ..

فى سحابه معديه و مخبيه القمر ..

فى برواز صور وقع انكسر ..

فى جارنا اللى فى الغربه

وباعت السلامات ..

بادور عليك فى كل الحاجات ..

فى بلوزة جديده قطع

كمها المسمار ..

فى صعيدى بيقدم كفنه

خايف من التار ..

فى حبيب سامح حبيبته

من غير اعتذار ..

فى حكايه منسيه من دون الحكايات

بادور عليك فى كل الحاجات ..